سميح والنسيان الصريح

سميح... والنسيان الصريح
================



سميح : صباح الخير ياشباب ازيكم ؟

مدحت : اهلا سميح.. بس صباح الخير ايه ؟!! احنا بالليل قصدك مساء الخير!

سميح : ايوه ايوه ما أنا واخد بالي.. وانت عامل ايه ياشوقي ؟

شوقي : انا الحمد لله بس مشغول شويه اليومين دول.

سميح : آه طبعاً ربنا يكون في عونك.. الامتحانات قربت.

شوقي : امتحانات ايه؟!! انا باشتغل ياسميح!

سميح : ايوه ايوه ما أنا واخد بالي.. ربنا معاك... وايه آخر الأخبار؟

مدحت : ابداً احنا ح نروح نحضر اجتماع سيدنا البابا في الكاتدرائية دلوقتي.

سميح : ايوه صحيح النهارده الخميس.. ده بيكون اجتماع هايل.

مدحت : خميس ايه ؟!! النهارده الأربعاء ياسميح.. مش باقولك اجتماع البابا!

سميح : ايوه ايوه ما أنا واخد بالي.. ده بيكون اجتماع جميل ومثمر جداً.

شوقي : مالك ياسميح.. انت بتنسي حاجات كثير.. وواضح انك مضطرب شويه..

سميح : ابداً ابداً.. انا زي الفل.. بس يمكن عشان مانمتش امبارح كويس بعد مارجعت من اجتماع الخدام.

مدحت : اجتماع خدام ايه ؟!! امبارح الثلاثاء مش الجمعه ياسميح!!

سميح : ايوه ايوه ما أنا واخد بالي.. اتكلمنا في الاجتماع عن الآباء البطاركة وتعبهم والحاجات الحلوه اللي عملوها في الكنيسه خصوصاً المشهورين بابطال الايمان.

شوقي : طبعاً كل بطريرك من دول كان له بصمة واضحة في الكنيسة.

مدحت : ياه.. تاريخ الكنيسه بتاعنا ده غني ومليان اعمال وانجازات رائعه للبطاركه بتوعنا ابطال الايمان... البابا بطرس خاتم الشهداء والبابا اثناسيوس الرسولي والقديس كيرلس عمود الدين والبابا ديسقورس وغيرهم وغيرهم...

سميح : ايوه طبعاً والبابا ابرام بن زرعه كمان اللي نقل جبل سانت كاترين بصلاة القديس سمعان الشيخ!

شوقي : نقل جبل المقطم بصلاة القديس سمعان الخراز.. فيه ايه ياسميح ؟

سميح : ايوه ايوه ما أنا واخد بالي..

مدحت : واخد بالك من ايه بس ؟ تحب نوديك للدكتور ؟

سميح : دكتور ليه !؟! هو انا عيان ؟!

شوقي : لا ابداً بس نشوف ايه حكاية النسيان اللي جت لك دي.

سميح : نسيان ايه !! انا مش بانسي ولا حاجه!

مدحت : بلاش تقاوح ياسميح... نروح للدكتور احسن.

سميح : نروح للدكتور ليه ؟!! هو انت عيان ولا ايه ؟ سلامتك الف سلامه!

شوقي : نروح للدكتور عشانك انت ياسميح مش عشان مدحت.

سميح : ايوه ايوه ما أنا واخد بالي.. بس حقيقي متشكر قوي انا كويس جداً جداً!

مدحت : طيب تحب تيجي معانا اجتماع البابا شنوده دلوقتي؟

سميح : اه طبعاً.. انا باحب قوي عظات قداسة البابا.

شوقي : طيب ياللا بينا.

سميح : علي فين ؟7

مدحت : علي فين ايه ؟!! انت مش قلت جاي معانا؟

سميح : فين ؟

شوقي : اجتماع قداسة البابا.. انت لحقت نسيت !!!!

سميح : ايوه ايوه ما أنا واخد بالي.. انسي ازاي ياللا بينا!

مدحت : انت واضح عليك انك مرهق قوي ياسميح ومش بتاكل كويس ومش واخد بالك من صحتك.

شوقي : وكمان واضح انك مشغول بحاجات كثير قوي.. وشايل الهم في حاجات اكثر.. وكل ده بيخليك تنسي كده.

مدحت : ايوه فعلاً ياسميح ماتفكرش كثير وماتشيلش الهم وربنا يدبر كل حياتنا.

سميح : ايوه طبعاً ربنا يدبر كل حياتنا.. وبعدين انا مش عاوزكم تقلقوا كده وتفتكروا اني تعبان وبسبب كده انا بانسي.. انا بس كنت باهزر معاكم!

شوقي : الله يسامحك ياسميح.. ده احنا قلقنا عليك قوي انا ومدحت.

سميح : مدحت مين ؟!!

مدحت : مدحت مين !!! ايه ياسميح.. انا مدحت!

سميح : ايوه ايوه ما أنا واخد بالي.. ازيك يامدحت ؟

مدحت : ازيك يامدحت ؟!! مااحنا بقالنا ربع ساعه مع بعض!

سميح : ايوه ايوه ما أنا واخد بالي وكانوا فعلاً احلي ربع ساعة.. احنا رايحين فين بقي دلوقتي ؟

شوقي : خلاص إحنا وصلنا الكاتدرائية اهو.

سميح : وايه اللي جابنا الكاتدرائيه؟

مدحت : يانهار ابيض.. فيه ايه ياسميح ؟

سميح : مالك يامدحت انت مستغرب كده ليه!!... انت النهارده غريب قوي!!

مدحت : انا برضه !!!

سميح : ايوه طبعاً.. مش كده ياشريف ؟

شوقي : شريف مين !! انا شوقي!

سميح : ايوه ايوه ما أنا واخد بالي.. فيه ايه ياجماعه مالكم النهارده... نصيحه لكل واحد فيكم: ماحدش يرهق نفسه ولازم تاكلوا كويس وتاخدوا بالكم من صحتكم وماتشغلوش بالكم كثير وماتشيلوش الهم في حاجات اكثر.. لان كل ده بيخليكم تنسوا كده.. ولا ايه رأيكم ياجماعه في.. في.. في.. هو انا كنت عاوز اخد رايكم في ايه؟!
هههههههههههههههه حلوة اوي اوي القصة دي يا تاسوني وبصراحة من كتر النسيان اللي فيها كنت تقريبا في اخر سطرين فيها ابتديت انسى الحروف ربنا يستر بقى ومانساش اخلص شغلي. الله هو انا عندي شغل عشان اخلصه؟؟ حد يفكرنييييييي
تاسونى مين هو انت بتتكلم مع مين انت قصدك انا ................
وبعدين انت مين .........................................
نصيحة وتحذير: الرجا عدم قراءة هذا الموضوع لانتشار عدوى
النسيان بين اعضاء ال....... ايه الفريق باين مش فاكرة

..................
................
..............

مش فاكر كنت حأرد أقول إيه

مرة واحد راح للدكتور

و قال : أنا بانسى كتير يادكتور

الدكتور: من أمتى و أنت بتشكى من المرض ده .

النساى : مرض أيه يا دكتور!!!!!!!!!!!!!!!!!!! `10`


` `15`
مرة واحد راح الحج. و بعد ما طاف حوالين الكعبة قعد يسأل نفسه "يا ترى أنا لفيت كم مرة؟ يا ترى أنا لفيت كم مرة؟ .. نلف تانى".
و بعد ما رمى الجمرات قعد يسأل نفسه: "يا ترى أنا رميت كم جمرة؟ يا ترى أنا ريمت كم جمرة؟ .. نرمى تانى".
و هكذا فى كل طقوس الحج لحد ما ركب الطيارة و رجع مصر. و هو نازل فى مطار القاهرة خبط على دماغه و صرخ: "يا ترى نسيت تعمل إيه كمان يا جورج؟!!!!"



ههههههههههههههههههههههههههههه ربنك يسامحك يا تاسوني الموضوع دا عمل حالة توهان في المنتدى `11` `15` بس سؤال مهم لحازم
هو ايه اللى ودا جورج يحج؟؟؟
أموت و أعرف يا بيتر

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.

أحدث الموضوعات

From Coptic Books

إجمالي مرات مشاهدة الصفحة من 10/2010