قميص النوم و الكنيسة

يمكن إسم الموضوع غريب شوية بس غصب عنى، و فى المنتدى بتاع كنيستى الموضوع ده محور نقاش ساخن، و علشان أوضح المقصود بقميص النوم هو الفساتين اللى بتظهر فى الكنيسة و خصوصاً فى الأفراح و الأعياد. و إحدى الصديقات قامت بنقل ردود البنات عن سؤالها لهم: إنت ليه لابسة كده فى الكنيسة؟! و كانت الردود كالآتى:
( م ): هى دية الموضة
( و ): انا مش معقدة علشان كدة بلبس بالشكل دة
( س ): الناس كلها بتلبس كدة اشمعنى انا؟! هوة انا هبقى شاذة لية عن الناس؟!
( د ): يعنى ملقتيش غيرى انا تسأليه؟! و يعنى هوة انا اللى هصلح الكون؟!
( ي ): علشان ابقى بنت روشة و كووووووووول
( أ ): و اية يعنى؟! ولا انتى عوزانى البس زى الناس البيئة؟! انا يا بنتى من الناس الهاى كلاس.
( ر ): علشان ألفت نظر الاولاد ليا علشان يكلمونى و اقدر ارتبط.
حد يرد علشان الكلام واقف فى زورى لو سمحتم.

سامحونى أنا مش قصدى أدين حد لكن "غيرة بيتك أكلتنى"، و لو حد قال "لو البنت لابسة كده بلاش إنت تبص" يبقى ييجى يسحبنى جوه الكنيسة علشان مطرح ما حأبص حألاقى نفس المنظر و نفس اللبس، و بالتالى يبقى حأمشى مغمض.

ســـلام ونعمة ليكم
فعلا يا أخ حــــــــازم داخل وخارج الكنيسة؟؟ , فى بعض البنات دا أسلوبها فى الحياة .....

اما تعلمون انكم هيكل الله و روح الله يسكن فيكم (1كو 3 : 16)

`14`
بصراحة انا باكون مكسوفة جدا عندما اشاهد نظرات غير المسيحيين خصوصا لبناتنا فى اى فرح أو خطوبة و لست ادرى متى و لماذا استقر هذا المفهوم فى نفوس البنات و السيدات المسيحيات ان كلما قل حجم القماش فيما ترتديه فان هذا يزيد من مكانتها الاجتماعية و يجعلها high class و حدث و لا حرج عن التعليقات اقلها ( انتو لحمكم رخيص ) مع ان لحمنا غالى جدا و مشترى بدم ثمين .
و اخر خطوبة حضرناها كانت فيها العروس ابنة لكاهن و كانت ترتدى فستان عجيب يكشف اكثر مما يدارى و لك ان تتخيل تعليقات سائق التاكسى الذى شاهدها
و من الاخر ... لو الناس ضاع منهم الضابط و اختلفت بداخلهم المعايير فرأي شخصيا ان اصدار تعليمات من ذوى الامر بوجوب الاحتشام و بعدم دخول الكنيسة إلا بما يليق اقل ما يجب فعله .
زمان كان من ضمن مهام الشماس الواقف على باب الكنيسة منع الحيوانات الضالة من الدخول الى الكنيسة أليس من الاولى ان نمنع دخول العثرات الى داخل الكنيسة .
و من جهه اخرى ما الذى يجعل ذئاب كثير تطمع فى بناتنا .
الموضوع ده اتكلمنا فيه كتير و البنات تفكيرهم ضحل جدا و لازم الأهل يعرفوا ان هم المسئولين و ليس اى احد اخر عن اى شئ يحدث لبناتهم من جراء ارتداء قمصان النوم تلك .
على فكرة فلقب "قمصان النوم" اصبح متعارف عليه بيننا عندما نشير لما يتم ارتدؤاه فى المناسبات !
عجبنى رد لقداسة البابا لما واحد ساله فى بنات فى الكلية بيلبسوا بطريقة شاذة ربد البابا وقاله بلاش تبص انت وخلى عينك وقلبك نظيفين
ولكن ده بردة مش معناه انهم صح ولازم حد ينصحهم على خطورة الى بيعملوه

ملعون من سبب عثرة لاخيه
سلام الرب لكم :
عايزة اقول انه فعلا موضوع اسمه غريب لكن لما ندخل فى الموضوع بنلاقيه موضوع مهم جدا .
بس بالنسبة للردود لو تسمحوا ليا اقول راى فى ردود منها لكن أكيد مش اقصد شخص معين :
اولا:"هى دية الموضة" طبعا دا مش حجة على كلمة زى كده لان الموضة مش للبس معين طيب ممكن يكون لبس شيك جدا جدا ورغم ذلك مناسب جدا لأولاد يسوع .
ثانيا:انا مش معقدة علشان كدة بلبس بالشكل دة طيب بكل سهوله ممكن تكونى لابسه مناسب جدا ورغم ذلك فى فأفكارك تعقيد من موضوع معين وتبقى بجد ساعتها معقده .
ثالثا:الناس كلها بتلبس كدة اشمعنى انا؟! هوة انا هبقى شاذة لية عن الناس؟! يبقى معنى كده انك مش مقتنعة باللى بتعمليه اوانك بتقلدى الناس مهما كانوا الناس.
رابعا:يعنى ملقتيش غيرى انا تسأليه؟! و يعنى هوة انا اللى هصلح الكون؟! ممكن اقول انه زى الرد اللى فات
خامسا:علشان ابقى بنت روشة و كووووووووول يعنى مثلا انتى مش شيك غير لما تلبسى كده .
سادسا: اية يعنى؟! ولا انتى عوزانى البس زى الناس البيئة؟! انا يا بنتى من الناس الهاى كلاس عايزة اقول فى الرد ده انه الناس البيئة يعنى ايه ؟ يعنى افكارها غريبة شويه ياجماعة بس ده اللى انا اعرفه برضه مش حجه ماهو انتى ممكن تكونى برضه بيئه بس لبسك شيك جدا يبقى كده انتى ايه انا اعتقد مش بالشياكة ولا اللبس ممكن تكونى بنت بسيطه جدا فى لبسك لكن فكرك متحضر جدا ومتفهمه للواقع ومش سطحية .
سابعا:علشان ألفت نظر الاولاد ليا علشان يكلمونى و اقدر ارتبط الرد ده باة انا سألت فى اخواتى
وللاسف قاللولى انهم لما يفكروا الاولاد او غالبيتهم يعنى فى الارتباط ببنت يختاروا اللى بتكون بسيطة وفبل كل شىء افكارها ايه؟ مناسبه لافكاره ؟
اريت ماكونش طولت عليكم بس فعلا موضوع زى ده المفروض يتقال فى اكتر من كده
والرب يكون معنا
`17`

وكذلك ان النساء يزيّنّ ذواتهنّ بلباس الحشمة مع ورع وتعقل لا بضفائر او ذهب او لآلىء او ملابس كثيرة الثمن


هذا هو راى الكتاب المقدس فيما ترتديه النساء وليس لى تعليق
الا ان كل واحدة لازم تاخذ معيار ملابسها من مايقوله الكتاب المقدس اذا كانت فعلا من اولاد الله

انا موافقة تماما على ما قالته تاسونى تى تى لان يجب على كل واحد ان يعمل ما فى الانجيل.
فعلا يا lolla و لكن هناك ايضا رد اسمعه من بناتى فى الخدمة يجعلنى اخرس و لا استطيع محاجاتهم اكثر
** بصى للبس الخادمات يا ميس قبل ما تكلمينى **

ولا تعليق !!!
سمع أحد الآباء الكهنة بقداسة أبونا بيشوى كامل، و كان هذا الكاهن من إحدى كنائس الصعيد على معرفة بخادم كبير يخدم مع أبونا بيشوى كامل فطلب منه أن يتقابل معه. فقام الخادم بترتيب موعد فى صلاة عشية بين الكاهن و أبونا بيشوى كامل. و أثناء اللقاء أتت سيدة ترتدى بلوزة بحمالات و مينى جيب (موضة وقتها) و قبلت يد أبونا بيشوى، فقام أبونا بيشوى بتقديم السيدة للأب الكاهن باسم (فلانة) خادمة معانا فى الكنيسة يا أبونا.

ذهل كاهن الصعيد الملتزم من كلمة الخادمة (فلانة) و التى لا تليق مع اللبس الذى تلبسه، و فكر فى قلبه إن كان هذا حال الخادمات فى مار جرجس سبورتينج مع أبونا بيشوى كامل الذى يقولون عنه أنه قديس فما حال باقى الشعب مع هذا الكاهن القديس. و أدان الأب الكاهن أبونا بيشوى فى قلبه، و أسلم ساقيه للريح.

مرت الأيام و تقابل الأب الكاهن مرة أخرى مع أبونا بيشوى كامل فى مكتبه، و أثناء اللقاء دخلت خادمة محتشمة ترتدى إيشارب على رأسها و قبلت أيادى الأباء الكهنة الجالسين فى المكتب. فقام ابونا بيشوى بتقديمها للأب الكاهن باسم (فلانة) خادمة معانا فى الكنيسة. و انصرفت الخادمة.

ذهل الكاهن لأن الاسم هو هو نفسه لصاحبة الملابس الفاضحة، و سأل أبونا بيشوى إن كانت هى نفس المرأة فأجاب أبونا بيشوى بأنها هى نفسها. فسأل الكاهن أبونا بيشوى كيف تم التغيير؟ فقال له أبونا بيشوى أن هذه المرأة تربية سبور و على الموضة، و قادتها قدميها مرة للكنيسة، فما كان من ابونا بيشوى إلا أن طلب منها أن تترجم له بعض الكتب من العربية إلى الفرنسية التى تجيدها هذه المرأة. فأخذت الكتب و بدأت تقرأ و تترجم، و لكن مع القراءة إتضح لها أن هناك آيات لا تتناسب معها و هى آيات عن الحشمة و وقار المرأة. و بدأت تتقرب من أبونا بيشوى و تسأله فى هذه الآيات، و كان أبونا بيشوى يشرح لها ما يقوله الكتاب المقدس فى هذه الآيات. خطوة بخطوة بدأت المرأة تغطى ذراعيها و ساقيها، ثم شعرها حتى أصبحت خادمة وقورة فى الكنيسة.

سمع الكاهن هذه القصة و هو يتعجب من حكمة أبونا بيشوى كامل و ايقن قداسته و اعترف له أنه أدانه فى اللقاء السابق حينما شاهد هذه السيدة و هى ترتدى ملابس غير محتشمة خاصة حينما قال أبونا بيشوى إنها خادمة فى الكنيسة.

لا تعليق
و لئلا يساء فهمى فيما يتعلق بملابس الخادمات ..
يا ريت نفهم نحن اولا انفسنا و لا يكون هناك انفصام فى شخصياتنا فكثير من الخادمات حريصات على لبس الملابس الواسعة يوم خدمتهم و احيانا تصل لحد الهرولة - ماحدش قال ان الحشمة بهدلة - و تصل معهم مرحلة الانفصام الى ان تصبح ملابس الخدمة مجرد uniform اما خارج مواعيد خدمتهم و فى عملهم او خروجهم او افراحهم فتجد شخصية مختلفة تماما تكاد لا تتعرف عليها .
لماذا نناقض انفسنا .. باختصار ملابسى هى جزء من شخصيتى و المفروض انى ابدأ بنفسى كخادم و اقوم بتلك المعادلة بينى و بين نفسى اولا حتى لا اكون شخصين و هنا يحدث ان يرى الناس شخص المسيح في .. فيتم التغيير من انفسهم كما حدث مع الخادمة التى تعامل معها ابونا بيشوى كامل
فليضئ نوركم هكذا قدام الناس لكي يروا اعمالكم الحسنة و يمجدوا اباكم الذي في السماوات (مت 5 : 16)
انا عاوزة اقول ان الخادمات هم قدوة للمخدومين . فلما اروح فرح الاقى الخادمات الى بيقولولنا ده صح و ده غلط لابسة ملابس غير لائقه و عمالة ترقص قولى المخدومين هيعملوا ايه . و لما اروح القداس الاقى الخادمة عمالة ترغى طول القداس فلما اقول لوحدة جنبى من فضلك عاوزة اسمع القداس هتقولى سكتى الخادمات الاول . و للاسف دة الى بيحصل اليومين دول فى الكنيسه بس بجانب دة فى خادمات قديسات و مثال حقيقى لاولاد المسيح و ربنا يحافظ على اولاده




رأى ان لو اولادنا وبناتنا اتربوا منذ الصغر اى من اول ولادتهم فى حضن الكنيسة

وداومت الاسرة على اصطحاب الابناء للقداسات ومدارس الاحد وتربى الطفل وربنا

جواه بصورة تلقائية تدريجية ونما على محبة ربنا ومخافته سنجد ان البنت او الشاب

يعرف جيدا ما يليق وما لايليق باولاد ربنا من غير ماحد يقول له البس ده واقلع ده

يعنى فى الاول ديه مسئولية الاباء اللى ماربوش اولادهم فى حضن الكنيسة

ولازم نرجع ونقول قول الكتاب ( ولكن كثيرون اولون يكونون آخرين والآخرون اولين مر 10:31 )