ينصــر دينــك يا بطــل


 

Laila Shedeed
ينصر دينك يا بطل

قتلت ناس عُزًّل كتير
  ستات، شيوخ وكمان عيال
  زحت عنا خطر كبير
  دي ناس بتقول الله محبه
  والمحبه دي شئ خطير
  إقتل بطرس   وإقتل مينا
  اللي إخواتهم   ماتوا في سيناء
  واللي ولادهم   رقصوا فـي فرحك
  واللي فـ ميّتم  بيعزّينا

  إقتل ماري   وطنط تريزا
  دول ناس مافيهومشي  ميزه
  دايمًا كده يبتسموا في وشك
  ويقولوا اهلاً  خطوه عزيزه

  وإقتل برضه عمّك حنا  
في اي خناقه  بيحوش عنّا
 غاوي يصّلح   بين الناس
  ولا يمكن   يوّرد على جنّه
 
وإقتل سامي ناجي نجيب
 اصل الإسم صراحه مريب
 يمكن يطلع واحد منهم
 او داقق على إيده صليب

 ولا اقولك...إضرب شبرا
 والكيت كات وميدان الاوبرا
  فجر واحده في كل مكان
  خلّي جيرانهم يصبحوا عبر

لينا رب إسمه الكريم ها يجي يوم تعرض عليه
  تقف امامه و يسألك الشخص ده عملك إيه؟
  بأي ذنب تقتله وفين ومين وإزاي وليه؟

  إبقى قول لي يا بطل  ها ترد يومها..
  وتقول إيه؟.

 احمد فؤاد نجم

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.

أحدث الموضوعات

From Coptic Books

إجمالي مرات مشاهدة الصفحة من 10/2010