بيقولوا هتحتاج عكاز؟ !!!! ( مهداة لأبينا قداسة البابا شنودة الثالث )





بيقولوا هتحتاج عكاز؟ !!!! ( مهداة لأبينا قداسة البابا شنودة الثالث )

------------------------------------------------------------------------------



كتب د. ياسر يوسف غبريال



بيقولوا هتحتاج عكاز

معقولة يا ولاد ؟؟

م إحنا عكازك ..

يا للي لفيت البلاد

ولادك ..

من سنين

مسنودين ..

على عكازك ..

*******************************

عكازك

ربنا موجود

القلب مصلوب

لكن البدن مفرود

سندك

صدق الوعود

دفء القلوب

وصبر القبطى

اللى ماله حدود

*******************************

سأل الطبيب

فين الوجع ..؟

قال في بلادي

والكسر فين ؟

في ولادى

والحق على مين ؟

مفروض على البادي ..

والظلم ..؟

بطول الـــــوادى !

*******************************

بيقولوا سافرت ..

امال ليه حاسين

انك وسطنا

بجد انكسرت ..؟

الكسر ده في جدار قلبنا ..

وحملنا

يا حلمنا

مين يشيله معانا

وعننا ..

امتى ترجع لنا ..

محتاجين حضنك

يا بابانا

يضمنا ..

*******************************

سأل طبيبه

إيه الفرق بين وجع البدن

ووجع الروح ؟؟

الأول يومين ويروح

والتاني ..؟

في القلب سكن ..

اجتهد الطبيب

يمكن علاجه يصيب ..

وإيه علاج

اللي دائه

الوطن ..

*******************************

لا يوم اشتكيت ..

ولا انحنيت ..

يمكن بكيت ..

لكن لا بعت ..

ولا اشتريت ..

غيرك باع

وتراب الوطن ضاع

وانت واقف زى اسد الكاروز

ارجع يا عيد النيروز

يموت الوالى

ودم الشهدا

يفوز ..

*******************************


بيقولوا هتحتاج عكاز

معقولة يا ولاد ؟؟

م إحنا عكازك ..

يا للي لفيت البلاد

ولادك ..

من سنين

مسنودين ..

على عكازك ..







ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.

أحدث الموضوعات

From Coptic Books

إجمالي مرات مشاهدة الصفحة من 10/2010