سميح المتين ..... وافراح الخماسين
سميح المتين ..... وافراح الخماسين
======================
ميلاد : ح نعمل ايه يا جماعة .. احنا رايحين رحلة نتفسح فيها
مش نتعكنن !
ميخائيل : وايه جاب سيرة العكننة بس يا ميلاد ؟
مجدى : ايوه يا ميخائيل .... ميلاد عنده حق ... انت مش شايف توزيع الحجرات ازاى ؟! انا شخصيا مش موافق ... يحطونا ننام فى اوضة رقم واحد اللى فيها اسامة وشريف.
ميلاد : احنا لازم نعترض لاستاذ ثروت !
سميح : مالكم بس يا جماعة فيه ايه صوتكم واصل لأخر الشارع ليه ؟
مجدى : طبعا ما انت مش على بالك .
ميلاد : تلاقيه مختار اوضته ومريح دماغه .
سميح : انا مش فاهم حاجة خالص ياجماعة ؟
ميخائيل : انا ح افهمك ياسميح " سى الاستاذ ميلاد والاستاذ مجدى مش موافقين ينزلوا فى رحلة الصيف فى اوضة اشرف واسامة .
سميح : ليه بقى ... مالهم اشرف واسامة ان شاء الله ؟
مجدى : مش بنحبهم .. خلاص ارتحت ؟
سميح : لا يا جماعة مش احنا اللى نقول كده .. عيب .. دول اخوتنا .. ان كنا مش مش حنحب اخوتنا امال نعمل ايه بقى ... عيب تقولوا كده ده احنا فى افراح الخماسين المقدسة وبعدين اهم حاجة فى الرحلة اننا مع بعض .. اهم حاجة الصحبة دى .
ميلاد : مش عاوزين الصحبة دى !
ثروت : مالكم ياولاد فيه ايه ؟
مجدى : بعد أذنك يا أستاذ ثروت مش عاوزين ننزل فى اوضة واحدة مع اشرف واسامة .
ثروت : ليه ياولاد ؟
ميلاد : أصلنا بصراحة مش بنستريح ليهم .
ميخائيل : بالذمة ده كلام " عيب كده "!
سميح : انا مش مصدق اللى بسمعه ده ... وفى فترة افراح الخماسين ؟!
ثروت : ايه يا ولاد الكلام الغريب ده ؟!! دول اخوتكم .. ان كنا مش ح نحب اخوتنا امال نعمل ايه بقى .
سميح : ياسلام يا استاذ ثروت على جمالك ... لسه كنت بقول كده ... وزودت على كلامك اننا فى افراح الخماسين وعيب يقولوا كده !!
مجدى : ارجوك يا استاذ ثروت ... من فضلك ابعدنا عن الاوضة دى .
ثروت : انا مش موافق على كلامكم ده ... بس حاضر ، انزلوا فى اوضة رقم اتنين .
ميلاد : لا.. لا.. لا.. اللى فيها مجدى ومنير .
مجدى : ياساتر ياساتر.
سميح : مالها دى كمان ؟
مجدى : لأ مش ممكن دول ولاد بيتحشروا فى اللى مالهومش فيه .
ميخائيل : عيب بقى الكلام ده .
سميح : انتو فعلا مش واخدين بالكم اننا فى الخماسين وافراحها وعيب تقولوا كده ؟
ثروت : انا مش موافق على كلامكم ده خالص ، بس علشان اخلص روحوا اوضة رقم تلاتة .
مجدى : ايه ايه ؟ الاوضة اللى فيها ميشو وفادى ؟
ميلاد : لالالالالا دول ليل نهار بيصلوا ... واحنا عاوزين ناخد راحتنا !!
سميح : لا بقى ... انا لولا استاذ ثروت ، ماكنتش سمحت ابدا ابدا بالكلام ده ... عيب بقى احنا فى الخماسين !
ثروت : انا مش عارف فعلا اقول لكم ايه انا مذهول .... طب اوضة اربعة ؟!
مجدى : لالالالالالالا ... مش ممكن !
ميلاد : احنا برضه ننزل فى اوضة فيها مينا و الفريد ؟ دول بيقروا قصص ليل نهار ويحكوها لبعض .
سميح : ايه ده .. حرام عليكم كفاية ... انا مش قادر استوعب اننا كنيسة واحدة وبنقول كده ... وفى الخماسين كمان !!! ... مش ممكن سامحهم يارب .
مجدى : ياسيدى وانت ايه مزعلك .. احنا مبسوطين كده .
ميخائيل : ايه الكلام ده ؟
ثروت : خلاص خلاص انا فعلا مش مبسوط من كلامكم ده يا ميلاد انت ومجدى ... بس خلاص اللى انتو عاوزينه خلاص .. ح احطكم فى اوضة ...
مجدى : اوعى تكون اوضة خمسة !!
ميلاد : ولا اوضة ستة !!
ثروت : لاخمسة ولا ستة ... ح احطكم فى اوضة لوحدكم انا مش عاوز مشاكل .
سميح : حظكم حلو ان استاذ ثروت طيب ... والا كان فعلا شكلكم حيبقى وحش قوى ... وكل ده فى الخماسين !
ميخائيل : سيبك منهم ... سيبهم ياسميح ... هما بعد شوية هيفوقوا .
سميح : يفوقوا ؟!! مافيش فايدة ... اذا كانوا مافاقوش فى الخماسين هيفوقوا امتى ؟
ثروت : خلاص ياولاد الموضوع خلص .
مجدى : متشكرين يا استاذ ثروت ... سلام ياجماعة ... ياللا ياميلاد .
سميح : سلام ياسيدى انت وهو .... عاجبك كده يا استاذ ثروت ؟
ثروت : معلش ياسميح .. هما لسه صغيرين برضه مش فاهمين ... ها ياسميح قول لى تحب تنزل فى اى اوضة ؟
سميح : اوضة رقم ثمانية .
ثروت : اشمعنى اوضة ثمانية ياسميح ؟
سميح : اصلها بعيدة عن الناس ... عن اشرف واسامة ودوشتهم .. ومجدى ومنير ومناخيرهم المحشورة ... وميشو وفادى وقداستهم ... ومينا والفريد وقصصهم ، وبصراحة مش برتاح خالص لهانى وامير ولا لبيتر ومرقس ولا مينا ومارك ولابيشوى وعادل .. وكفاية انها بعيدة عن ميلاد ومجدى وارائهم الغريبة دى ... وعن ميخائيل كمان اللى دايما معترض على اراء اصحابه زى ماشفت ... وانت عارف يا استاذ ثروت خسارة ان يتعكنن علينا واحنا فى افراح الخماسين ... مش كده برضه ولا ايه ؟
ثروت : آآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآآه
طيب يا ريت بقى بالمرة تشوفوا لى منتدى بعيد عن تاسونى تيتى و بيتر و باهر و أنستاسيا و الشباب اللى هنا كلهم
كدة برضو يا حازم ؟؟؟ يهون عليك العيش والملح والاكل الكوري؟؟؟ ها واخد بالك من الاكل الكوري؟؟ دا انا مش هسيبك ابدا يا حبيبي فين ماتروح مش هسيبك دا احنا بينا تار قديم فاكره ولا ايه؟؟؟؟؟ وتاسونى تيتي تشهد.
ياحازم طيب نجيب لحضرتك منتدى تانى بعيد عننا ازاى وده اسمه كلام برضه وخاصة اننا فى افراح الخماسين ................
الصراحة مفروض تشوفوا لى انا منتدى تانى بعيد عن حازم وبيتر والاكل الكورى والتار اللى انا شاهدة عليه بينك وبينه وانا عاوزة منتدى بعيد عن التار والكلام ده والدوشة عاوزاه يكون منتدى من غير وجع قلب
ملحوظة : انا هكلم استاذ ثروت حالا `13`
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.