شاركونا بأرائكم حول شكل ومحتويات المنتدى

سلام ونعمة
يا باهر باشا من فضل سعادتك بطلبها منك بليييييييييييييييييييييييييييييييييييز قدام المنتدى انك تغيرلنا الوان المنتدى الفحلقي دي ولا هي عاجباكوا يا جماعة؟؟؟؟؟؟؟؟؟؟؟؟؟؟؟؟؟؟؟؟؟؟؟؟ طيب اللي عاجباه الالوان يقول واللي عندوا اقتراحات يقول خلال اسبوع من النهاردة ........ معلش اصل الالوان مش عاجباني خالص
عندي بقى حاجة كمان بالمرة بقى ... في حاجة في المنتدى اسمها
صوت الشباب المسيحي استمع الى الانجيل ودي موجودة في كل الصفحات فوق بانر الاعلانات اعتقد ان الافضل تكون استمع الى الكتاب المقدس ولا ايه؟؟ لان كلمة الانجيل تشير الى الاناجيل او البشائر الاربعة لكن الكتاب المقدس اعم واشمل
شكرا جزيلا



حمد الله على السلامة ياعم بطوط انا قلت ان الانترنت فى جزيرة البط لغوه خلاص علشان كده مش بنشوفك
وبعدين بقى مالها الوان المنتدى البحلقى حسب قولك . طيب هو فيه اجمل من البحلقى ياسلام على البحلقى وجمال البحلقى حتى يخليك تبحلق كويس فى المنتدى وهو المطلوب اثباته

اما بالنسبة ملحوظتك على الاستماع للانجيل والمطالبة بتغييرها الى الكتاب المقدس انا معك ايضا فى كلامك وطبعا الكلام لك ياباهر

وحياتك ياعم بطوط ماتحرمناش من حضرتك كتير لانك بتثير الحيوية والمرح فى المنتدى بس انا عاوزة اسألك سؤال علشان اطمن بيه على صحة اعضاء المنتدى بما انك بطوط من الطيور اخبار انفلونزا الطيور ايه معاك علشان العدوى بس فى المنتدى ربنا يستر

نورتنا يابطوط وكترتنا ووحياتك ماتغيبش عننا

ازيك ياباشا اولا انت وحشنا كتير وقلة وجودك ماثرة فينا كتير
ثانيا : انا هتفلسف شوية `15` الالوان البحلقية والفزتقوحلية ده من الالوان المييزة جدا عند اصحاب الاعلانات علشان تبحلق وكمان هتلاقى فى الخلفية لون خفيف والبانر كمان لون خفيف
وانا غيرت الانجيل الى الكتاب المقدس

بالنسبة لموضوع انفلونزا الطيور بيقولوا البط مش بيجيلوا انفلونزا الطيور تقريبا بطوط جايبلهم واسطة

الله الله ايه دا !!!!!!!!!!!!!!! انتوا بتتريقوا على البط ولا ايه؟؟؟؟؟؟؟؟؟؟؟؟؟ لا لا انا كدة ازعل واقول للبط ماينزلش على اي صينيه في العيد انا سامع ان في شغل جامد للبط العيد دا يا جماعة وسامع كمان انه ناوي ينزل محشي كمان من غير ما ست البيت تتعب وتحشيه يم يم يم ... اما بالنسبة للون البحلقي بحرف ال ب فتقريبا انتوا قريتوا كلامي غلط لانكوا بتشكروا في اللون البحلقي دا... لا لا يا جماعة انا كتبتها فحلقي بحرف ال ف واللون دا فحلقي وهيخلى بتوع الاعلانات يهربوا من هنا الا ان كانت شركة بتعلن عن اقمصة مشجرة زي بتاعت التسعينات عشان هتبقى الوانها زي الوان المنتدى

بس بجد ميرسي انك غيرت كلمة الانجيل للكتاب المقدس وعشان روح التعاون الحلوة دي انا مش هبطل زن عليك عشان تغيرلنا الوان المنتدى `16`



بص يابطوط .. رب ضارة نافعة وبما انك كنت غلطان فى اللون وظلمتنا ان اللون بحلقى مع انه طلع فحلقى فالحمد لله ظهر الحق وزهق الباطل لان اللون الفحلقى من اجمل الالوان الفحلقية التى تجعل الانسان له القدرة على الفحلقة وهى بنت عم البحلقة لزم وهى من نفس العائلة التى تجعل الانسان فى حالة من السعادة والانسجام مع الوان المنتدى التى يستخدم تلك الالوان بحرفنة عالية جدا فشكرا لك على هذا التصحيح الذى اعاد الامور الى نصابها الصحيحة

اما بالنسبة للاعلانات وهروب اصحابها فهو المطلوب لاننا لانريد اى اعلانات تجارية لانه منتدى خدمى وليس تجارى

ولى تصحيح على معلومة كتبتها خاطئة وهى الخاصة بالالوان المشجرة للقمصان وهى كانت فى فترة السبعينات وليست فى التسعينيات اى قبل مولدك بسنوات لذا لزم التنويه والتصحيح

ياااااااااااااااااااااحرااااااااااااااااااااااااااام يا بطوط . اوعى تغير اسم اللون تانى .

بس كلام فى سرك اللون ده ينرفز اوى و تخيل الشغل بتاعى برضه فيه نفس الالوان تخيل مش عارفة هلاقيها
من المنتدى و لا الشغل . انا انادى بتغير لون المنتدى `16`



الى الابنة المباركة ويتا
انا شايفة انك تغيرى الوان الشغل او حتى تغيرى الشغل نفسه اسهل لك من تغيير الوان المنتدى

`13`

أؤيد بشدة و خصوصاً فى فترة الكريسماس.
يا ريت يتم إضافة صور للميلاد و فرحة الكريسماس و بابا نويل و شجرة الميلاد و المغارة.
العالم كله بيتزين بمناسبة الكريسماس و مش معقول المنتدى بتاعنا يبقى قرديحى كده.

و بخصوص كلمة قراءة الانجيل أو الكتاب المقدس فأنا برضه أؤيد و أشجب و أندد و أستنكر كلمة الانجيل لأن المفروض إن الانجيل جزء من الكل.

بمناسبة الوان الشغل تخيلوا ان انا قاعد في مكان لونه كدة كله كدة حيطانه كدة ناسه كدة اجهزته كدة لكن انا واثق ان لون المنتدى ممكن يتغير في يوم من الايام وهيستمتع بيه اولادنا لكن احنا لازم نكافح عشان اولادنا والاجيال الجاية تلاقي الوان حلوة في المنتدى
بالنسبة لاقتراح الدكتور اللوا حازم باشا فانا اعرف ان المنتديات دي بيبقى ليها templates ممكن تتظبط بحيث يظهر شكل المنتدى بروح الكريسماس مثلا وهكذا وبتكون templates جاهزة ومش محتاجة مجهود كبير ولا ايه يا باهر بيك
ربنا يكون في عونك يا ويتا وعوني انا كمان ضد التاسوني وباهر اللي عاجبهم اللون الدلحقي دا

بصراحة ياجماعة أنا مش عارف أيه حكاية الألوان دى...اللى يقول فحلكلى واللى يقول بحلقلى ، صدقونى كل ده مابيفرق معانا ، المهم مضمون المنتدى وممكن أختصره فى كلمة واحدة بس وهى ..... " ثروة ".....لأنه موسوعة من المعلومات ومن الفكر المتنوع اللى ممكن يستفيد منه أى أنسان فى مختلف المجالات ، كل ده بخلاف المحبة والأخوة اللى بتربط بين كل أعضاءه...بعد كل ده ونختلف على الألوان !!!!
لكن ده مايمنعش اننا داخلين على الكريسماس وأعياد الميلاد ولازم نفرح مع بعض بمسيحنا وبالأعياد وبمنتدانا المحبوب ، لذلك..فى دى ، أنا مع الأراء اللى بتطالب بجعل المنتدى كله فرحان وده يظهر من خلال بعض شجر الكريسماس وبعض الأنوار والأضاءات الجميله والمزود والمجوس وملك الملوك فى وسط كل ده فرحانين بيه ، وكنت أتمنى أنى أعرف أعمل بنفسى الحاجات دى ، لكن للأسف العصور الوسطى اللى أنا جاى منها لم تعلمنى الأبداع بهذه التقنيات...ربنا يجعل هذا المنتدى سبب بركة لكثيرين وتكون الخدمة من خلاله لمجد أسمه القدوس وحده.
.....وكل سنة وكلكم بخير وسعادة مع يسوع.



ايه ده يابطوط هو قلب اللون واصبح دلحقى ربنا يستر من اللى جاى هيكون زحلقى

على فكرة انا كمان معاكم فى الراى بس انا بعتت لباهر رسالة على الماسنجر قلت له نزولا على رغبة الجماهير ولاننا فى منتدى ديمقراطى فبناء عليه نطالب بتغيير شكل المنتدى ةخاصة اننا مقبلين على عيد الميلاد كل سنة وكل شعب المسيح بخير وسلام وكل شعوب العالم

اما بالنسبة للاستاذ سمير احنا صدقنى مش مختلفين ولا حاجة احنا بنثير جو من المرح والفرح والمحبة بين الاعضاء لان مثلا الابنة المباركة ويتا هى ابنتى الجسدية يعنى انا امها يبقى ازاى هختلف معاها

اما الابن الحبيب بطوط فهو ابن لى وله عندى من المحبة المقدار الكبير جداا لاننا تعرفنا فعليا من خلال المنتدى وتقابلنا معا انا وبطوط وباهر وحازم اى انها معرفة حقيقية وليست من خلال المنتدى فقط اما باقى الاعضاء فهم بمثابة الابناء او الاخوة لنا نكن لكل فرد منهم كل المحبة والاحترام وحضرتك طبعا اخا عزيزا لنا وابا حبيبا للشباب

وشكرا لكلماتك المشجعة عن المنتدى ونرجو من الرب ان يبارك فى الخدمة


........................أمين........................

.....................يايسوع أمين....................


....................................................

شكرا جدا ياباهر على التجديدات الي فى المنتدى بس بلييييييييييييييييييزززززززززززززززز

غير الوان النتدى `17`


شكرا طبعا على التجديدات و مش حاتكلم على الالوان الرائعة
لكن على المحتويات فاعتقد اننا بحاجة
1- للموضوعات ذات المناقشة المفتوحة التى نستفيد فيها من اراء الكل و ذلك لنستغل التباين فى الاعمار و الظروف الخاصة باعضاء المنتدى
2- الاستفتاءات فكرة جميلة و مفيدة لبدء مناقشة اى موضوع
شكرا على اهتمامكم الدائم بالتجديد و كل سنة و انتوا طيبين
`16`
اده اده هو فى ايه ؟؟؟؟ هو انا علشان غبت شوية عن المنتدى لقيت تغيرات كتيرة و على فكرة للى مش عاجبه لون المنتدى انا كنت قاعدة على النت ساعة ما اونكل باهر كان بيعمل الالوان دى و على فكرة انا كمان مش عجبانى الالوان بس بجد على الكروت اللى محطوطه جديد بس انا عايزة اقول ان مفيش موقع عامل الالوان دى لان احنا مش اى حد


نشكر ربنا و نحمد فضله ان أونكل باهر غير شكل المنتدى
كده احلى الحقيقة

marco55 فى المنتدى و يارب تستفيد منه و يارب نشوفك على طول فى المنتدى و على فكرة انت وشك حلو علينا اول ما دخلت انكل باهر غير شكل المنتدى

و على فكرة انا بقول اونكل علشان انا صغيرة و عندى 12 سنة بس علشان ما تفتكرش ان احنا فى المنتدى لازم نقول انكل

ايه التجديد الرائع ده
سؤال يا تاسونى لو انت عايزة تعاقبى بطوط على طلبه بتغيير الالوان انا ذنبى ايه `14`

سؤال تانى ليه المنتدى لا يرسل رسائل على الايميل بالجديد فى المنتدى


صدقينى اللى تعبان بجد هو باهر لانه هو اللى بيغير وانا اللى على اقول حلو ولا لا بالرغم ان ابنه البيبى عيان لكنه بيشتغل فى الموقع ربنا يعوضه ويشفى ابنه يارب ويارب التجديد يعجبكم ولسه فيه حاجات تانية ، بتتعمل الان انتظرى وشوفيها وقولى رايك برضه

تسلم إيدك يا باهر و تعيش لكل سنة و ألف سلامة على البيبى.
ايه رايك يا evrest_h تمسكى انت موضوع الرسائل بكل جديد فى المندى يوم بيوم
من خلال جروب جوجل احنا محتاجين كل مساعدة وكل خدمة ممكن حد يقدمها

تسلم ايديك يا باشا والف سلامه على ديفيد وكل سنة وانتوا طيبين
الون أجمل بكتييييييييييييييييييييير شكرا ليك يا أستاذ بـــــــــاهر



ياريت نشوف ارائكم كلكم فى التجديدات بالنسبة للالوان وللفلاشة بتاعة الميلاد وربنا يبارك فى عمل ايدك ياباهر ويعوضك تعب محبتك وكل سنة وكل اخواتنا اعضاء المنتدى بكل خير وسلام وبركة وصحة ونجاح
وكل واحد فينا محقق كل امانيه

هي الالوان احسن بس انا واثق ان باهر عنده احسن من كدة بالنسبة للالوان وكمان بالنسبة لالوان الفونتات واشكالها .... بس ربنا يشفي ديفيد ويفضلنا باهر و يظبط الدنيا اكتر ... على العموم تسلم ايديك يا باشا بس عاوزين احسن من كدة كمان
لا كدة كويس خالص يا باهر شكرا جدا على تعبك
اولا ألف سلامة لديفيد يا أ/ باهر
و فعلا الالوان جميلة جدا و طبعا انا تحت امر المنتدى بس لو انت فهمتنى واحدة واحدة ايه بالظبط استطيع عمله لارسال رسائل للاعضاء ( الخطوات )
بس ايه واحدة واحدة لأنى بانتمى لعصر ما قبل استخدام الحاسوب `13`

موقع روعة ، ومنتدى أروع ، وموضوعات أروع وأروع ، وألوان أروع وأروع وأروع ، وباهر أروع وأروع وأروع وأروع ، وربنا يعوضه عن تعبه ويكافئه فى أبنه ، بشفاعة ست الكل أمنا العدرا والقديس الأنبا بيشوى ، بشفاعتهم ربنا يلمس دافيد لمسة شفاء ، وطمنا عليه ياأستاذ باهر.

ليست هناك تعليقات:

إرسال تعليق

ملحوظة: يمكن لأعضاء المدونة فقط إرسال تعليق.

أحدث الموضوعات

From Coptic Books

إجمالي مرات مشاهدة الصفحة من 10/2010